Tá løgreglan fer út um mark

Hvat hendir, tá ein løgreglumaður fer frá at jagstra brotsfólk til sjálvur at fara um markið?

Leygarkvøldið 7. november verður ein serstakur fyrilestur um hetta evnið á KG Hotel í Klaksvík.

René Dahl Andersen arbeiddi í meira enn 15 ár sum løgreglumaður á Vesterbro, millum annað í narkotikadeildini og í loyniligum arbeiði millum brotsfólk. Hann kennir tí ein heim, sum tey flestu bert síggja uttanífrá.

Í “HÆRDET – Á markinum millum lóg og lógarbrot” greiðir hann opið frá einum lívi á eggini, um at røkka toppinum og síðani sjálvur at missa fótafestið.

Frásøgnin er ikki bara spennandi. Hon reisir eisini spurningar, sum eru viðkomandi hjá okkum í Føroyum: Hvussu fyribyrgja vit kriminaliteti? Hvat ger arbeiði í einum hørðum umhvørvi við menniskju? Hvar gongur markið millum vald, ábyrgd og persónligar avgerðir? Og hvat kunnu vit sum lítið samfelag læra av royndunum hjá øðrum?

Atgongumerki til fyrilesturin fáast á atgongumerki.fo