Sáttmálasemja við arbeiðarafeløgini

Semja er í dag funnin um nýggjan tvey ára sáttmála millum arbeiðarafeløgini og Føroya Arbeiðsgevarafelag.

Føroya Arbeiðarafelag skrivar á netinum, at partarnir í samráðingunum í dag hava góðtikið semingsuppskotið, sum gevur arbeiðarafeløgunum eina grundlønarhækking á 9,66 krónur yvir tvey ár umframt at viðbøturnar fyri starvsaldur hækka.

Viðbótin fyri hægsta starvsaldur verður nú 8 prosent eftir 11 árum, og hinar viðbøturnar hækka eisini umframt at tíðarskeiðið nær tær verða latnar verður styttri.

- Sum heild eru vit nøgd við lønarhækkingina. Hækkaðu starvsaldursviðbøturnar gera, at vit klára at halda stand í mun til prísvøksturin, skrivar arbeiðarafelagið.