Ingi Samuelsen
Kjarnorkustovnurin í Ukraina upplýsir í morgun, at spreingingin av Nova Kakhovka byrgingini har suðuri í Ukraina kann verða til vanda fyri kjarnorkuverkið Zaporizjzja.
Men fyribils er tamarhald á støðuni, skrivar Reuters.
- Neyðugt er við vatni frá Kahkovka-byrgingini fyri at verkið kann fáa streym til turbinu kondensatorarnar og til trygdarskipanina á ZNPP (Zaporizjzja-værket, -red.), skrivar Energoatom í einum boðum á nettænastuni Telegram.
Kjarnorkustovnurin upplýsir víðari, at nóg mikið av vatni er í goymsluni hjá kjarnorkuverkinum. Neyðugt er við vatninum at køla kjarnorkureaktorarnar.
- Klokkan 08.00 er vatnstøðan 16,6 metrar, sum er nóg mikið til tørvin hjá verkinum, skrivar Energoatom.
Ein líknandi fráboðan kom eisini frá serfrøðingunum á altjóða kjarnorkustovninum, IAEA.
Haðani ljóðar, at stovnurin heldur eyga við støðuni við byrgingina. Men at tað ikki er nakar beinlsiðis vandi fyri trygdini á Zaporizjzja-verkinum, skrivar IAEA á Twitter.
Nova Kakhovka liggur í Dnepr-ánni.
Hon heldur 18 rúmkilometrar av vatni, sum verður brúkt til køling av Zaporizjzja. Byrgingin veitir eisini vatn til Krim hálvoynna.
Vandi er fyri vatnflóð í økinum undir byrgingini. Í morgun eru myndugleikarnir farnir í gongd við at flyta fólk burtur úr økjunum, sum eru í størsta vanda.
Vinarliga broyt tínar kennifíla - og privatlívsstillingar fyri at síggja hetta innihald