Eingin fingið staðfest smittuna seinasta samdøgrið

Tað eru framvegis 187 føroyingar, ið hava fingið staðfest koronasmittuna. Sostatt er eingin tilburður staðfestur seinasta samdøgrið, upplýsir Landslæknin í morgun, nú seinastu kanningarúrslitini eru tøk.

Hetta byggir á 6.588 kanningarúrslit.

Í løtuni eru 178 føroyingar staðfestir frískir, eftir at hava fingið staðfest smittuna, tað sama talið sum í gjár.

Eingin persónur er í løtuni innlagdur á Sjúkrahúsverki Føroya í sambandi við koronasmittuna. Í løtuni eru 49 fólk í sóttarhaldi, ein meira enn í gjár.

Eftir ætlan verða fáar kanningar gjørdar í dag, og næstu ferð nýggj kanningarúrslit verða almannakunngjørd verður týsdagin 28. apríl.