Vóna nú at hava Voxbotn í august

Voxbotn hevur ferð eftir ferð verið útsett vegna koronu, og ætlanin hjá fyriskiparunum um at hava tiltakið hetta vikuskiftið verður nú heldur ikki til nakað.

Fyri einum mánað síðani søgdu fyriskiparar, at tey vónaðu at kunna hava tiltakið leygardagin 31. juli, tá ein stórur partur av føroyska fólkinum væntandi var liðugt koppsettur fyri koronu.

Men koppsetingin hevur ikki gingið so skjótt sum myndugleikarnir høvdu vónað, og fyri løtu síðani komu fyriskiparar av Voxbotn so við keðiligu boðunum um, at teir ikki fáa loyvi frá myndugleikunum at halda Voxbotn leygardagin. Tó siga teir seg nú vóna at tað fer at bera til at skipa fyri Voxbotn í august í staðin.

– Myndugleikarnir hava tó áður kunnað um, at vit kunnu liva sum vanligt í august, og tí er avgjørt, at Voxbotn verður í august. Nærri kunning í komandi viku. Liggur tað ikki fyri til komandi áseting, ber til at fáa atgongumerkið endurrindað. Nærri kunning í komandi viku, skriva fyriskiparar á Facebook.

– Vit harmast støðuna, men mugu sjálvandi fylgja tilmælunum.