Sverri Egholm
Pauli Trond Petersen boðaði týsdagin Vestmanna kommunu frá, at hann ynskti at leggja frá sær sum borgarstjóri. Í kvøld, á eyka bygdarráðsfundi, skal bygdarráðið taka støðu til hvør skal vera borgarstjóri í kommununi.
Fýra mál eru á skránni. Tað fyrsta er skrivið frá Paula Trond Petersen um at vera loystur úr starvi. Síðan er skipan av bygdarráðnum, val av nevndum og til síðst setanarbrøkur borgarstjórans.
Varaborgarstjórin Bjørg á Rógvi hevur røkt borgarstjórastarvið seinastu mánaðirnar meðan Pauli Trond Petersen hevur verið til fiskiskap við Vestmenningi.
Hann segði við útvarpið fyrr í vikuni, at hann heldur fram sum bygdarráðslimur valskeiðið út, men stillar ikki uppaftur næsta val. Heldur ikki í landspolitikki.
Pauli Trond Petersen fekk 248 atkvøður til seinasta kommunuvali.
Eyka bygdarráðsfundurin er opin fyri almenninginum og verður klokkan 20 á kommunuskrivstovuni.
Vinarliga broyt tínar kennifíla - og privatlívsstillingar fyri at síggja hetta innihald