Útlendskur maður breyt beinið í Kalsoynni

Stutt eftir klokkan 11 fyrrapartin í gjár vórðu boð eftir tyrluni hjá Atlantic Helicopters.

Orsøkin var, at ein útlendskur maður, sum hevði verið á Kallinum, hevði brotið beinið.

Sambært heimasíðuni hjá Vørn varð maðurin fluttur á Landssjúkrahúsið.

Og tað er hent fleiri ferðir hesa vikuna, at tyrlan hevur verið eftir fólki, sum eru komin til skaða í fjøllunum.

Mikudagin varð ein útlendskur maður eisini fluttur við tyrlu av Kalsoynni, tí hann hevði fingið skaða í beinið, og mánadagin fór tyrlan eisini eftir einari kvinnu í Kunoy, sum hevði fingið skaða í armin.

Sambært løgregluni varð tyrlan eisini boðsend tvær ferðir hósdagin eftir fólki. Eitt útlendskt ferðafólk breyt beinið við Norðadalskarð, og eitt annað útlendskt ferðafólk breyt armin í Nólsoy.