Ungdómsbókasavnið letur upp á Býarbókasavninum

Leingi hevur verið tørvur á, at ungdómurin fær meira pláss og betri umstøður á Býarbókasavninum í Havn. Í fjør varð farið undir at umvæla á 2. hædd, og loksins er ungdómsbókasavnið klárt at lata dyrnar upp. Á ungdómsbókasavninum hava tey ungu umsíðir fingið sítt egna stað, eitt bókasavn, sum er serliga innrættað til teirra.

Hósdagin 22. september letur nýggja ungdómsbókasavnið upp fyri almenninginum við røðum og framførslum, og høvi verður at síggja ungdómsbókasavnið.

Ungdómsbókasavnið er blivið eitt innbjóðandi stað, sum gevur teimum ungu íblástur, møguleika og umstøður at vera á bókasavninum. Umframt at hava eitt gott úrval av ungdómsbókum á bæði føroyskum, donskum og enskum, hevur ungdómsbókasavnið eisini teknirøðir, pláss at spæla borðspøl, lesikrókar og góðar lestrarumstøður. Á vetrarskránni fyri ung eru millum annað lesiringar fyri ung, verkstovur og borðspælskvøld.

Nógv ymisk tiltøk fyri ung og ungar sálir eru á skránni hósdagin 22. september:

Skráin fyri dagin

Fyrrapart:
10.00 Ungdómsbókasavnið letur upp
10.10 Býarbókavørðurin bjóðar vælkomin
10.20 Borgarstjórin ella formaðurin í Mentanarnevndini heldur røðu
10.30 Ýr Ákadóttir, ungt listafólk, greiðir frá listaverkunum á ungdómsbókasavninum
10.40 John Fuglø, ungdómsbókavørður á Kulturium í Ishøj, hevur framløgu
10.50 Køka og hugni

Kl. 11 og fram:
Allan dagin koma ung úr fólkaskúlunum at síggja og hoyra um ungdómsbókasavnið.

Seinnapart:
16.00 Ungdómsbókakafé. John Fuglø, ungdómsbókavørður á Kulturium í Ishøj, viðmælir bøkur
17.00 Borðspælskafé: TableTop Føroyar kemur at greiða frá og viðmæla borðspøl
18.00 Tónleikaframførsla við Marius DC