Stongja Køkubúðbrekkuna í tvær vikur

Í eina tíð hevur bara borið til at koyra oman í býin umvegis Køkubúðbrekkuna, men leygardagin verður stongt fyri allari ferðslu undantikið bussleiðini.

Av tí at talan er um arbeiði við stórum bilum og maskinum og um spreingiarbeiði, er tað bara Bussleiðin og arbeiðsakfør hjá Andriasi Berg, sum hava loyvi at koyra í brekkuni í J. Paturssonar gøtu í tíðarskeiðnum, sigur kommunan.

Brekkan verður fyrst og fremst stongd av trygdarávum, men eisini fyri at fáa arbeiðið munandi skjótari liðugt. Parkerinsøkið í brekkuni er eisini stongt alt tíðarskeiðið.

Talan er eitt av mest nýttu vegastrekkjunum í miðbýnum í Havn, og kommunan heitir á borgarar um at vísa atlit, og vera í góðari tíð tá aðrar farleiðir verða nýttar.

- Fyri at ferðslan á hesum alternativu leiðunum heldur ikki gerst alt ov tøtt í roktíðini, er tað gott, um tað til dømis ber til at møta einar 15 minuttir fyrr ella 15 minuttir seinni til arbeiðis, sigur Tórshavnar kommuna.