- Seinastu tvey árini hevur vøksturin verið avmarkaður. Gongdin í løntakaratalinum hevur ikki verið tann sama sum undan koronufarsóttini, men nú tykist løntakaratalið aftur at vera vaksandi og vøksturin tiltakandi. Tað bendir trendurin á, sum lýsir rákið í løntakaratalinum.
Soleiðis skrivar Hagstovan á heimasíðu sínari í dag, har víst eisini verður á, at tað bæði eru fleiri kvinnur og menn í løntakaraskaranum nú.
Í apríl vóru 14.226 menn og 13.565 kvinnur í løntakaraskaranum. Tað er um 260 fleiri menn og 220 fleiri kvinnur enn sama mánað í fjør.
Samanlagda talið fyri apríl var 27.791, og tað er 1,8 prosent fleiri enn í fjør - 473 løntakarar.
Um hugt verður eftir býtinum eftir vinnugreinum, so sæst ein javnur vøkstur í 'almennari o.a. tænastu' og 'privatu tænastuvinnunum'. Tað hava verið færri løntakarar í byggivinnuni seinastu árini, men trendurin bendir á, at løntakaratalið ikki minkar longur, skrivar hagstova.fo, har fleiri tøl eru útgreinaði.
Vinarliga broyt tínar kennifíla - og privatlívsstillingar fyri at síggja hetta innihald