Leitingin steðgað

Seinastu dagarnar hevur verið leitað eftir kvinnuni, sum hvarv við Trælanípuna í Vágum fríggjamorgunin. Síðan leygarmorgunin hevur bert verið leitað á sjónum, eftir at leitingin á landi ikki gav nakað úrslit, men eisini tann leitingin er steðgað nú.

Vakthavandi á MRCC-støðini upplýsir fyri Portalinum í morgun, at Brimil gavst at leita í gjárkvøldið, tá tað bleiv myrkt – uml. klokkan 19.30 – og orsakað av illveðrinum í morgun verður ikki mett, at tað loysir seg at fara út aftur at leita.

– Nú er so nógv tíð fráliðin, at vit hava ongar vónir um at finna kvinnuna á lívi, sigur vakthavandi, sum ikki sigur seg hava nakra viðmerking til, um leitingin verður tikin uppaftur, tá veðrið batnar.