Stórar ætlanir á heimsins minsta tjóðpalli

Mett eftir áhuganum og jaligu afturmeldingunum og lógvabrestunum, so liggja bjartar tíðir og bíða eftir teimum, sum hava áhuga fyri leik- og palllist í Føroyum.

Seinnapartin í dag bjóðaði nýggi stjórin fyri Tjóðpall Føroya, Harald Thompson Rosenstrøm, til ’sesongbyrjan’ í sambandi við at skráin fyri vetrarhálvárið á tjóðpallinum er klár.

Harald T. Rosenstrøm byrjaði í starvinum sum stjóri fyri tjóðpallin 1. apríl, og hetta var fyrsta ferð, at hann alment traðkaði fram fyri at vísa hvørjar ætlanir hann hevur sum ovasti leiðarin fyri palllistini í Føroyum.

Tað kennist sum farnu mánaðirnir eru væl gagnnýttir, tí stjórin kundi fortelja um eina gjøgnumarbeidda strategi fyri "heimsins minsta tjóðpall við 1,75 starvsfólkum", sum hann málbar seg.

Livandi leikhús á høgum støði

Tjóðpallurin hevur sett sær fleiri mál fyri komandi tíðina, eitt nú at tjóðpallurin skal vera eitt livandi leikhús, sum kann vísa palllist á altjóða støði við viðkomandi evnum. Eisini er ein ætlan um, at tjóðpallurin í enn størri mun skal vera fyri alt landi, og koma meira út í hini mentanarhúsini í landinum við sínari list.

- Okkara ynski er at fortelja føroyskar søgur á okkara palli, og harvið hava vit eisini eitt ynski um at fáa sett gongd á, at fleiri føroyskir leikir verða skrivaðir, segði  Harald T. Rosenstrøm millum annað.

Ábøtur meðan bíðað verður

Komandi tjóðleikhús var ikki eitt evni sum so á tiltakinum seinnapartin, men bæði Eirikur í Jákupsstovu, mentamálaráðharri, og Elsa Berg, borgarstjóri, lovaðu í sínum røðum á tiltakinum, at gongd er í málinum, og at staðsetingin verður á havnalagnum í Havn.

Men ásannandi, at tað fer at taka drúgva tíð áðrenn eitt nýtt tjóðleikhús stendur liðugt at taka ímóti leikarum og gestum, so lá tað eisini í kortinum, at Tjóðpallinum tørvar, og eisini fær játtan til at bøta upp á umstøðurnar, sum stovnurin nú hevur, tí tað er neyðugt.

Brecht fyrst á skránni

Á tiltakinum seinnapartin vístu leikarar tvey brot úr fyrsta leikinum, sum verður settur upp á Tjóðpallinum undir nýggja stjóranum.

Tað er ein leikur eftir Bertold Brecht, ”Gerandislív í triðja Ríkinum”, sum ukrainin Orest Pastukh leikstjórnar.

Leikararnir Sufía Nolsøe Mikkelsen, Kjartan Hansen, Súsanna Tórgarð, Hans Tórgarð og Bjørn Mouritzarson Mohr, megnaðu at skapa áhuga fyri hesum leiki, sum á komiskan hátt lýsir trupla gerandislívið í Týsklandi eftir at Hitler hevði fingið valdið, men áðrenn hann fór í kríggj við grannalondini.

Ein leikur, sum sambært leikhússtjóranum, er rættiliga viðkomandi fyri tíðina í dag eisini.

”Gerandislív í triðja Ríkinum” verður frumframførdur 20. september, og forsølan er longu byrjað.

Tríggir leikir eru settir á skránna afturat í vetur, ein í november, ein í mars og ein í apríl. Talan er um leikir av ymsum slag til ymsar málbólkar, allir við útlendskum leikstjórum.

Eitt annað av málunum, sum nýggi leikhússtjórin hevur sett er nevniliga, at skapa størri samstarv við útlendsk leiklistafólk á høgum støði at koma til Føroya, eins og føroysku leikirnir skulu og eiga at sleppa at royna seg uttanlands eisini.