Ingi Samuelsen
Ein vanlukka kemur sjáldan einsamøll, plaga tey at siga. Í Haiti kunnu tey staðfesta, at so er í løtuni. Bert tvey samdøgur eftir ógvusliga jarðskjálvtan, rakti tropiski stormurin Grace í nátt, skrivar AP-tíðindastovan.
Serliga útsynningsparturin av landinum varð raktur av hørðum hvirlum og ógvusligum avfalli. Síðan helt stormurin sína leið víðari yvir Tiburon hálvoynna, ið er langi smali tangin í útsynningspartinum av Haiti, og helt leiðina víðari móti Jameika og Kuba.
Fleiri staðni varð ávarað móti skriðulopum og yvirflóð orsaka av nógva avfallinum.
Í býnum Les Cayes, ið varð serliga hart raktur í jarðskjálvtanum, er sjúkrahúsið ovurfylt, og sjúklingar mugu bíða úti á gongum og svalum. Ætlanin um at seta upp tjøld til teir nógvu sjúklingarnar vórðu sleptar, tá ávaringarnar um ódnina Grace bórust.
Myndugleikarnir í Haiti hava júst dagført tølini av deyðum frá jarðskjálvtanum til 1.419, meðan 6.000 eru særd, skrivar dr.dk.
-
Skadd frá jarðskjálvtanum uttan fyri sjúkrahúsið í Les Cayes (Mynd: EPA)
-
Tropiski stormurin Grace hevði nógv avfall við sær. Myndin er frá grannalandinum Dominikanska Lýveldinum (Mynd: EPA)
Vinarliga broyt tínar kennifíla - og privatlívsstillingar fyri at síggja hetta innihald