Fyribils akkurát sum vanligt á Okkara

- Allir tangar eru fullir, og tað væl umtøkta Várbryggið er skjótt klárt. Tað merkir at fyribils er tað “business as usual”.

Tað siga Atli Mikkelsen, fyrrverandi stjóri á Okkara, og Einar Waag, núverandi stjóri á Okkara umframt eigari.

Í einum skrivi, sum er sent miðlum seinnapartin greiða teir frá, at ikki alt sum hevur verið frammi um Okkara seinastu dagarnar, er satt.

Ein óheftur ráðgevi hevur hugt eftir roknskapartølunum, og givið greið boð um at stongja.

Nevndin og fimm starvsfólk í føstum starvi eru søgd upp, men tvey av teimum leiðandi starvsfólkjunum hava langa uppsagnartíð, og hava játtað at koyra virkið víðari fyribils.

Teir siga, at Okkara vørur eru framhaldandi at fáa í Rúsuni og á vanligu sølustøðunum. 

Okkara hevur siglt í tungum sjógvi síðani byrjanina í 2010. Kappingarneytin Føroya Bjór keyti í 2020 virksemið, men tað hevur higartil koyrt hvør sær.

"Brandið" Okkara er vert at varðveita, men neyðugt verður at tillaga framleiðsluna, siga Atli Mikkelsen og Einar Waag.