Áarlop í Norðragøtu og Lamba í nátt

Tvey áarlop órógvaðu fólk í regninum í gjárkvøldið og í nátt.

Nakað fyri midnátt fekk løgreglan boð um eitt áarlop í Lamba og eitt í Norðragøtu. Í báðum førum rakti skriðan eini hús, og í báðum førum var kommunala tilbúgvingin boðsend fyri at fara út at hjálpa til við at beina vatnið burtur og tøma kjallararnar fyri vatn.

Ongar fráboðanir eru um mansskaðar í sambandi við áarlopini.

Tað var annars í Klaksvík og Haraldsundi, at óttin var størstur fyri at áir fóru at leypa nú blot kom í kavan samstundis sum tað regnaði illa, men haðani hevur løgreglan ongar fráboðanir fingið.

Hinvegin var fráboðan um eitt lop á Elduvíkarvegnum um 10 tíðina í gjárkvøldið. Vegurin hevur síðan verið stongdur fyri ferðslu.

Landsverk fekk fráboðan um støðuna, men løgreglan dugdi í morgun ikki at siga, nær roknast kann við, at koyrandi verður til Elduvíkar aftur.

Á heimasíðuni hjá Landsverki framgongur, at tað tað í løtuni ikki er koyrandi til tvær bygdir – til Elduvíkar og Skælings.