98 metrar boraðir í Sandoyartunlinum

Arbeiðið at gera Sandoyartunnilin er so smátt byrjað. Tað upplýsir tunnilsfelagið í dag.

Eftir at Eysturoyartunnilin var skotin liðugur tann 7 juni, hevur NCC arbeitt við at taka niður og seta í stand útgerðina, sum brúkt var í Eysturoyartunnilin.

Borivognurin varð settur í gongd 4. juli og nú eru í alt boraðir 98 metrar. Fríggjadagin verður farið í summarferiu fram til ólavsøkudag, tá byrjað verður aftur.

Einaferð eftir summarfrítíðina verður eisini byrjað at bora á Gomlurætt, sigur Eysturoyar- og Sandoyartunlar.