Ungt Virki á Kambsdali fríggjadagin

Fríggjadagin 24.mars verður kappingin Ungt Virki hildin á Miðnámi á Kambsdali.

Ungt Virki er eitt tilboð til allar miðnámsskúlanæmingar í aldrinum 15 til 25 ár, sum ynskja at læra, hvussu tey kunnu menna nýggjar vørur og tænastur frá hugskoti til veruleika, og hvussu tey fáa hesar út á marknaðin.

Ungt Virki er eitt breitt samstarv millum miðnámsskúlar, Betri, Vinnuhúsið, Íverksetarahúsið, Hugskotið, Fróðskaparsetrið og vinnulívið, og næmingar fáa ymsa ráðgeving ígjøgnum hesi samstørv eins og fíggjarligan stuðul til arbeiðið frá Betri.

Í fleiri ár varð tiltakið hildið í SMS, og hetta hevur altíð verið væleydnað. Í fjør varð avgerð tikin um at royna at fáa tiltakið inn á skúlarnar. Í fjør varð Ungt Virki hildið á Glasi, og í ár verður tiltakið so hildið á Miðnámi á Kambsdali.

Í ár luttaka 16 bólkar við yvir 50 næmingum úr Tekniska Skúla í Klaksvík, Miðnám á Kambsdali og Glasi. Tey ungu hava síðani august fingið undirvísing í nýskapan og íverksetan og hava m.a. lært at menna nýggjar vørur og tænastur. Harafturat hava tey fingið royndir í, hvat skal til fyri at stovna og reka egna fyritøku.

Tað verða níggju dómarar úr føroyska vinnulívinum, sum koma at meta um hugskotini og geva bólkunum afturmeldingar um teirra hugskot og framløgur. Dómararnir eru Regin Dalsgaard, Thetis, Óli Kristian á Torkilsheyggi, Navia, Sóley Hammer, Hugskotið, Elsa Maria Olsen, Íverksetarahúsið, Rói Poulsen, Nema, Anna Eystberg Hofgaard, Betri, Ragnar O. Sundstein, LookNorth, Suni Justinussen, JT-Electric, og Eyðvør Berg, Berglon.

Tiltakið byrjar kl. 9.30 og endar kl.16, tá vinnarin verður kosin. FM-vinnarin umboðar Føroyar í finaluumfarinum í Keypmannahavn í apríl, har tey bestu liðini í kongaríkinum fara at dystast um besta hugskotið.

Menna næmingar til framtíðar størv

Kanningar vísa, at næmingar, sum fáa undirvísing í nýskapan og íverksetan gleðast um at ganga í skúla og seta sær hægri mál fyri útbúgving og yrkisleið. Harumframt kenna tey seg at hava nakað at geva samfelagnum, og tey eru bjartskygdari um framtíðina. Tey menna fakligar, persónligar og sosialar førleikar, ið eru neyðugir fyri at megna framtíðar størv bæði sum íverksetar, leiðarar og starvsfólk.