Trump hóttir við at støðga handlinum við Evropa

Amerikanski forsetin, Donald Trump, hóttir nú við at støðga við at handla við Evropa, um ES ger álvara av einum uppskoti at geva Kanada atlimaskap í ES.

Tað segði hann við AFP tíðindastovuna í nátt.

- Hetta er láturligt. Um tey gera hetta, og um eg á nakran hátt uppfati tað sum eina fíggindaliga gerð, so fari eg at áleggja ógvusligan toll ella støðga handlinum við Evropa á nógvum økjum, segði forsetin.

Tað kemur ikki fram, hvat Trump meinar við, tá hann sigur, at hann við “støðga øllum handli við Evropa”. Hann kom heldur ikki inn á hvussu høgir tollurin verður, um hann fer at hækka teir.

ES-nevndarforkvinnan, Ursula von der Leyen, segði í gjár á síni árligu state-of-the-union røðu, at ES fer at lata dyrnar upp og gera Kanada til fyrsta ‘assosieraða limin’ í ES.

Forsætisráðharrin í Kanada, Mark Carney, var til staðar í ES-tinginum í Strassbourg undir røðuni. Hetta var fyrsta ferðin, at ein stjórnarleiðari úr landi uttan fyri ES sjálvur var til staðar í ES-tinginum.

Í Brússel hava tey uttan úrslit kanna landakortini fyri at vita, um ikki Kanada hevur eina lítla oyggj ella okkurt landaøki í Evropa. Men so er ikki. Kanada er partur av norðuramerikanska meginlandinum saman við USA. Tí kann Kanada sambært sáttmálanum ikki gerast fullgyldugur limur í Evropasamveldinum.

Og tí verður loysnin sum atlimur – associeraður limur – nevndur.

Viðurskiftini millum Mark Carney og Donald Trump eru í inniverandi árið versnað munandi. Umframt at londini hava hækkað tollsatsirnar sínámillum, hevur Trump eisini tikið avgerð um at kalla Ontariovatnið fyri ‘Lake America’. Ontario er ein av statunum í Kanada.

Avgerðin hjá Trump hevur skapt øsing í Kanada, og Mark Carney hevur eisini sagt, at navnabroytingin ikki vær nakran virknað í Kanada. Kanadiski forsætisráðharrin hevur eisini víst á, at navnið á stóra vatninum er 400 ára gamalt, og var galdandi langt áðrenn USA og Kanada vórðu skipað sum tjóðir, skrivar Ritzau.