Tríggir bilførarar tiknir fyri rúsdrekkakoyring

Hetta vikuskiftið er Bátafestivalur á Toftum og Dansibandsfestivalur í Vági, og løgreglan sigur, at skilið har hevur verið gott.

Tó hevur løgreglan tikið tríggjar bilførarar fyri rúsdrekkakoyring í Eysturoynni seinasta samdøgrið. Ein varð tikin stutt fyri klokkan fýra seinnapartin í gjár, og hinir báðir vórðu tiknir í nátt.

Løgreglan hevur eisini havt úr at gera við at hjálpa fullum fólki. Í fimm førum mátti løgreglan koyra fólk til hús, sum høvdu fingið ov nógv niðurum.