Tofta skúli savnaði omanfyri 60.0000 krónur til Ukraina

Tofta skúli skipaði 3. mai fyri einum sera væleydnaðum stuðulsátaki til frama fyri Hjálp til Ukraina”.

Stuðulsátakið varð skipað sum ein stuðulsrenning uppi á rennibreytini á Svangaskarði, hvar ið allir næmingarnir runna ella gingu í ein hálvan tíma.

Fleiri møguleikar vóru at stuðla átakinum. Nógv valdu at lata pening, fyri at stuðla næmingunum, sum gingu ella runnu. Onnur komu við reiðum peningi.

Næmingaráðið í Tofta skúla skipaði eisini fyri fløskuinnsavnan og nógur peningur kom eisini inn ígjøgnum teirra átak, skrivar Nes kommuna á heimasíðuni.

Eftir stuðulsrenningina á Svangaskarði, fóru øll oman í Tofta skúla, har allir næmingarnir og skúlabólkurin fingu sunkist og søtmeti, sum Nes kommuna hevði latið til høvið.

Stuðulsátakið endaði við einari almennari hugnaløtu. Á skránni varð nógvur sangur, har næmingar spældu undir á ljóðføri og sungu fyri til felagssangin. Nógv foreldur, ommur, abbar og aðrir næstringar møttu upp til hesa hugnaløtu. Tá sangløtan var liðug, varð boðið til ein góðan kaffimunn.

Eftir áheitan frá Nes kommunu var 8. flokkur og ruddaði á Svangaskarði ein dag herfyri. Samsýningin fyri hetta arbeiðið fór eisini óskerd til stuðulstiltakið.

Nú er endaliga gjørt upp, hvussu nógv kom inn til stuðulsátakið ”Hjálp til Ukraina”. Inn komu 63.024,50 kr.

Beint eftir morgunsangin í Tofta skúla í morgun, varð kekkurin handaður til Reyða Kross. Tað var Jónas Thomsen, formaður í næmingaráðnum, sum gjørdi hetta vegna Tofta skúla.

Kristianna W. Poulsen, sum umboðaði Reyða Kross í morgun, takkaði hjartaliga  fyri og minti á, hvussu stóran týdning tað hevur, at vit øll standa saman og vilja hjálpa í neyðstøðu.