Skip, sum sakk við 14 monnum, er grundtónin í fyrstu útgávuni

Eitt skip søkkur, og 14 mans sjólátast. Hetta er grundarsteinurin til fyrstu útgávuna "..eftir" hjá Klingru. Til ber at uppliva tónleikararnar og tónleikin á útgávuni tann 25. apríl, kl 19.30, tá Klingra hevur útgávukonsert í Norðurlandahúsinum.

Hendingin við skipinum, sum sakk, fór fram fyri 70 árum síðani, tá føroyskir fiskimenn kendu seg kroystar úr egnum havøki av enskum og týskum trolarum, og tí fóru longri norður við fiskarínum - teir flestu til Føroyingahavnina í Grønlandi.

Her arbeiddu nógvir føroyskir sjómenn næstan alt árið fyri at vinna til lívsins uppihald. Ein teirra var Napoleon á Neystabø. Stutt fyri at Napoleon andaðist sum 94 ára gamal, greiddi hann abbasoni sínum, Dánjali á Neystabø, sum er partur av Klingru, frá um tíðina í Føroyingahavnini og um eitt skip, sum gekk burtur við 14 monnum umborð. Hendan hendingin er síðani vorðin grundtónin í fyrstu útgávuni hjá Klingru.

Umframt hetta hevur Klingra tikið upp sokallaðar field-recordings - upptøkur í sjálvari Føroyingahavnini í Grønlandi, og eru hesar ein partur av elektroakustisku pørtunum í tónleikinum.

Klingra er sprottin úr viðurkenda bólkinum Afenginn. Limirnir í Klingru eru úr Føroyum, Danmark, Finnlandi, Noregi og Lettlandi.

Atgongumerki til konsertina kunnu keypast á nlh.fo.