Semingsfólk boðsend

Sáttmálasamráðingarnar millum Føroya Arbeiðsgevarafelag og arbeiðarafeløgini slitnaðu í gjárkvøldið, og nú eru boð send eftir semingsfólki fyri at hjálpa til við at finna eina semju.

Tað skrivar Havnar Arbeiðarafelag á heimasíðu síni.

Sáttmálarnir fóru úr gildi 1. mai og síðan hava partarnir sitið við samráðingarborðið, har gamli sáttmálin er lýstur at galda í eitt ella fleiri samdøgur afturat, alt eftir hvussu samráðingarnar hava gingist. Seinast varð sáttmálin longdur yvir vikuskiftið at vera galdandi til á midnátt mánakvøldið.

Men nú slitnaðu samráðingarnar, og samráðingarleiðslan er nú latin yvir til semingsfólkini.

Fyrsti samráðingarfundur í hesum umfari varð hildin 7. apríl – sáttmálakrøvini vórðu latin hálvan mars.