Ræst letur upp í nýggjum hami

Matstovan Ræst í Nýggjustovu í Gongini í Havn, sum hevur verið afturlatin í vetur, letur uppaftur 4. apríl.

Men tað verður í nýggjum hami og við nýggjum meksikanskum høvuðskokki.

Ræst er jú tann týdningarmesti smakkurin í matmentan føroyinga. Ræst er ein serstakur, skarpur rámi, ið stavar frá tí gamla mátanum at heingja kjøt og fisk upp at ræsa og turka uttandura.

Matstovan Ræst, sum er systurmatstova hjá Koks og Roks, leggur dent á at brúka og vísa føroyska siðvenju greipaða við og í sameining við nýmótans rák úr ymsari matmentan. Við altjóða tilfari, mentanarligum mannagongdum og gomlum matgerðarsnildum, leggja høvuðskokkurin Sebastian Jimenéz og hansara toymi dent á at styrkja handfaringina av ræsing við støði í hansara meksikanska arvi.

Høvuðskokkurin Sebastian Jimenéz og høvuðssommelier Karin Visth hava fínkað ta listarligu sameiningina av altjóða matmentan og fornari matsiðvenju í Føroyum við gjølla útvaldum drykkjuvørum frá góðkendum og burðardyggum framleiðarum um allan heim.

- Í okkara søguliga umhvørvi finnur tú satt søguligt trúvirði og nýgerð samansveisað undir sama taki, sigur matstovan í tíðindaskrivi.

Og Sebastian Jiménez, høvuðskokkur, sigur tað soleiðis:

- Eg eri meksikanskur kokkur, og tað er avgjørt ein feril av Meksiko í okkara siðbundnu føroysku matgerð í Ræst. Ræst skal umboða mínar royndir í matgerð saman við tí, eg havi lært, meðan eg havi búð í Føroyum og arbeitt á Koks.

Sebastian hevur arbeitt í køkum um allan heimin, síðani hann var 17 ára gamal. Hann hevur havt sína egnu støkkuppmatstovu, Cocina Ocho – eitt stað við íblástri úr hansara egnu rótum og matmentan.

Tá ið hann var 21, fekk hann møguleika at byrja og mynda hugtakið latínamerikanskur køkur í Dubai. Hetta gjørdi, at hann varnaðist enn fjølbroyttari matmentan í londum sum Teilandi, Indonesia, Fraklandi, Niðurlondum, Russlandi og at enda í Føroyum.

Síðani 2019 hevur Sebastian verið partur av Koks-toyminum. Í 2022 umboðaði hann Føroyar í kappingini hjá S.Pellegrino akademinum fyri ungar kokkar í Norðurevropa og vann virðislønina, kallað “Vit elska fína matgerð og tankavekjandi mat”.

Sebastian hevur nú gjørt av at brúka sínar fjølbroyttu royndir til at reka køkin í Ræst.

Umframt Sebastian Jimenéz, høvuðskokk, og Karin Visth, høvuðssommelier, er Sidsel  Vita, matstovuleiðari og somelier í Ræst.

Matstovan borðreiðir við eini matskrá, sum kostar 1.400 krónur. Aftur at matskránni er ein røst alkoholsameining fyri 950 krónur ella ein røst alkoholfrí sameining fyri 550 krónur.

Ræst verður í hesum umfarinum opin frá 4. apríl til 30. september 2023.

(Mynd: Durita Pætursdóttir Christensen)