Píkadekk til hálvan mai

Tíðarskeiðið har tað er loyvt at brúka píkadekk er nú longt við hálvum mánað.

Tað sigur einn kunngerð sum Jørgen Niclasen, landsstýrismaður, hevur lýst.

Sostatt ber nú til at koyra við píkadekkum til 15. mai, og ikki til 1. mai, sum tað var í gomlu kunngerðini. Píkadekkini kunnu koma upp á aftur frá 15. oktober.

Tó kunnu neyðsendarakfør og akfør, sum verða nýtt í sambandi við vetrarhaldið hjá landi og kommunum, nýta píkar í nevnda tíðarskeiði teir dagar, ið hálka er. Sama er galdandi fyri stovnsbilar hjá Kriminalforsorgini og stovnsbilar hjá kommunalu heimatænastuni.