Paul Manafort er funnin sekur í skattasviki

Paul Manafort, fyrrverandi kampanjuleiðari hjá amerikanska forsetanum Donald Trump, er funnin sekur í fimm førum av skattasviki og trimum øðrum ákærupunktum.

Í dómstóli í Virginia koyrir sak, sum handlar um svik og hvítvasking, móti Paul Manafort. Sakin er eitt úrslit av kanning, sum varð sett í verk at kanna sambandið millum valkampanjuna hjá amerikanska forsetanum og Russland.

Tilsamans átjan ákærupunkt eru reist móti Manafort, har størsti revsikarmurin er 305 ár. Hann er funnin sekur í átta, men nevningatingið eru ikki samd í hinum tíggju, skrivar DR.

Sakin hevur sum so einki við kanningina av sambandinum millum valkampanjuna hjá Trump og Russland at gera, men prógvini móti Manafort eru vorðin kend við kanningini.