Oda Strøm
Ein motorvegabrúgv er rapað í norðuritalienska havnabýnum Genova.
Tað skrivar italienska tíðindastovan Ansa.
Talan er um Morandi-brúnna, og sambært Ansa er tað eitt petti av brúnni, sum er rapað 100 metrar uppifrá. Myndugleikarnir meina, at tað mesta av brúnni rapaði í eina á.
Sambært tíðindastovuni AP eru í minsta lagi 10 akfør við í vanlukkuni.
Eingi váttaðir upplýsingar eru komnir enn um hvussu nógv eru særd ella dripin, men óváttað tíðindi frá bjargingarfólki á staðnum siga sambært Ansa, at fleiri fólk eru deyð, tí brúgvin datt omanyvir bilarnir, sum knústust.
Motorvegurin var opin fyri ferðslu, tá ið vanlukkan hendi umleið klokkan 11:30, skrivar Genova24.it. Brúgvin er eitt týdningarmikið knútapunkt fyri ferðslu frá sentrala Italia til Fraklands, og orsakað av at heiligdagur er í morgin, halda myndugleikarnir, at sera nógvir bilar vóru á vegnum.
Morandi-brúgvin er uppkallað eftir Riccardo Morandi, sum gjørdi fleiri brúgvar í Italia í 1960'unum og 1970'unum.
Mynd: EPA
Vinarliga broyt tínar kennifíla - og privatlívsstillingar fyri at síggja hetta innihald