Í dag koma umleið 18.000 skamtir av koppingarevni til Føroyar. Hetta er met, tí ongantíð áður eru so nógvir skamtir komnir til landið í einum.
Hetta skrivar Heilsumálaráðið á heimasíðu sínari
- Komandi vikurnar kemur nógv koppingarevni til Føroya. Tilsamans koma slakir 34.000 skamtar í juli. Meginorsøkin til stóru nøgdina av koppingarevni, sum kemur til Føroyar er, at Danmark hevur keypt 1,17 mió. skamtar av koppingarevninum Pfizer-BioNTech frá Rumenia.
Stóru nøgdirnar hava eisini við sær, at munandi fleiri tíðir verða tøkar til koppseting. Frá í morgin, mikudegnum 7. juli, ber til at bíleggja nýggjar tíðir á corona.fo. Sjúkrahúsverkið fer at koppseta allar dagar komandi tíðina.
Somuleiðis verður tíðarskeiðið millum fyrra og seinna prik stytt, skrivar hmr.fo - hetta fyri at fáa fólk skjótari liðugt koppsett. Tíðin ímillum hevur verið 28 dagar - fýra vikur - men tað verður 21 dagar framyvir. Tað ger mun, nú nýgga Delta-frábrigdið eisini hevur tikið seg upp í Føroyum, boða heilsumyndugleikarnir frá.
Koppsetingarkalendarin verður framskundaður við tveimum vikum. Nú verður roknað við, at øll, sum eru 16 ár og eldri, verða liðugt koppsett í viku 34 23.-29. august). Hesi skuldu annars eftir ætlan verið liðugt koppsett í viku 36. Øll hava væntandi fingið í boði fyrstu koppsetingina áðrenn ólavsøku.
Les eisini:
Koppsetingarætlanin framskundað í tvær vikur
Nú eru yvir 50.000 koronukoppsetingar gjørdar í Føroyum
Vinarliga broyt tínar kennifíla - og privatlívsstillingar fyri at síggja hetta innihald