Mary givin sum vaskikona eftir 46 ár

Hon hevur vundið tvøguna fyri seinastu ferð eftir at hava vaskað fyri Tórshavnar kommunu í samfull 46 ár. Í sambandi við at Mary Jensen er givin sum vaskikona, beyð Heðin Mortensen, borgarstjóri, henni til ein drekkamunn á Ráðhúsinum í dag.

Heimasíðan hjá Tórshavnar kommunu skrivar, at fyrsti ferð Mary Jensen skimmaði við Velbastaðvegin var í 1973, tá ið stovnurin lat upp. Hon vaskaði Dagstovnin við Velbastaðvegin í 28 ár, og aftaná tað hevur hon vaskað Býráðssalin, Móttøkuhúsið og Degnshús í 18 ár.

- Mary er avbera fyrikomandi og hevur altíð verið arbeiðssom og álítandi í starvinum. Sum tøkk fyri drúgva tænastu fekk Mary eina gávukurv og bringuprýði frá Tórshavnar kommunu.

Mary er 78 ár, nú hon er givin at vaska fyri Tórshavnar kommunu.