Konsertir við Dreingja- og manskórinum úr Haderslev

Í næstum verða konsertir við Dreingja- og manskórinum úr Dómkirkjuni Haderslev.

Leiðari er organisturin í Dómkirkjun Henrik Skærbæk Jespersen, sum í 2019 var í Føroyum við “Orguldreingjunum” úr Haderslev. Hesaferð hevur hann 50 sangarar í aldrinum níggju ár og uppeftir við sær. Teir ungu dreingirnir syngja allir sopranstemmurnar meðan teir vaksnu syngja alt, tenor og bass, verður sagt í tíðindaskrivi.

Kórið hevur ferðast víða um og fleiri ferðir sungið fyri teimum kongaligu til barnadóp og onnur høvi. Teir hava sungið í øllum dómkirkjunum í Danmark, og fara teir eisini at syngja til guðstænastuna í Havnar kirkju sunnudagin 29. mai klokkan 11.

Kórið fer eisini hava fleiri konsertir meðan teir eru í Føroyum:

• Kr. himmalferðardag hósdagin 26. mai kl. 20 verður konsert í Christianskirkjuni í Klaksvík.
  
• Fríggjadagin 27. mai kl. 20 verður konsert í Fríðrikskirkjuni á Toftum
  
• Leygardagin 28. mai kl. 16 verður konsert í Hoyvíkar kirkju og
  
• Sunnudagin 29. mai syngur kórið sum nevnt til guðstænastuna kl. 11 í Havnar kirju
  
  

Á skránni er danskur svenskur og enskur kórtónleikur, og sum eykanummar fer kórið at syngja eina útseting sum kórleiðarin hevur gjørt av vælumtókta sanginum hjá Steintóri Rasmussen “Tað kundi verið eg”.