- Grasagarður er einasta veruliga almenna kommunala spæliplássið í Tórshavn, og ynskið er tí, at tað skilur seg burturúr í mun til spælipláss á dagstovnunum og úti í eigarafeløgunum.
Hetta skrivar Tórshavnar kommuna á heimasíðu sínari í samband við, at Grasagarður nú skal dagførast, sambært einum heildaruppskoti ið er tilevnað.
Seint í fjør varð peningur játtaður til endamálið, men tað bar ikki á mál at finna fram til eitt endaligt heildaruppskot frá veitaranum. Verkætlanin at skipa og gera nýtt spælipláss í Grasagarði varð tí boðin út alment - sum ein heildararbeiðstøka, og fevnir verkætlanin um allar tilfars- og arbeiðsveitingar í sambandi við skipan og gerð av spæliøki í Grasagarði sambært heildaruppskoti.
Tórshavnar kommuna boðar frá, at seks tilboð komu inn, og at metti kostnaðurin fyri verkætlanina var 5,72 milliónir.
- Herfyri kunngjørdi umsitingin, at spæliplássið skal gerast bæði forvitnisligt, nýskapandi og øðrvísi í mun til tað klassiska spæliplássið við siðbundnu spæliútgerðini, sum somuleiðis er í samsvari við tilráðingarnar í barna- og ungdómspolitikkinum hjá Tórshavnar kommunu.
Fundur hevur verið við Javna, har víst varð á teirra sjónarmið í sambandi við spæl og atkomu fyri børn við rørslutarni. Heimasíðan torshavn.fo skrivar, at vinnandi uppskotið er sera fevnandi fyri øll, bæði í mun til atkomu og spæl á øllum økinum, men nakrar smávegis tillagingar kunnu gerast í tilgongdini fyri at fáa Grasagarð enn betur fyri førleikaskerd børn/ung.
Fundur hevur somuleiðis verið við fyritøkuna AFRY um at ljósseta Grasagarð, soleiðis at spæliøkið eisini er innbjóðandi í myrku tíðini. Sáttmáli er gjørdur við Arta/Grønt & Grátt um verkætlanina, skrivar torshavn.fo at enda.
Vinarliga broyt tínar kennifíla - og privatlívsstillingar fyri at síggja hetta innihald