Innanlands

Granskingarráðið bjóðar næmingum at luttaka í Ársins Vitanarfróðu 2021

Næmingarnir granska tað, teir hava hug til, og síðani skulu teir gera eina frágreiðing og senda hana til Granskingarráðið – frestin er 23. apríl

Mynd: Granskingarráðið

Mynd: Granskingarráðið

2021-01-25 18:43 Author image
Alda Nielsdóttir
placeholder

Granskingarráðið bjóðar aftur í ár øllum næmingum at vera við í granskarakappingini Ársins Vitanarfróðu.

Næmingar kunnu arbeiða saman sum flokkur ella í smærri bólkum á í minsta lagi fimm næmingar. Næmingarnir kunnu granska tað, teir hava hug til í øllum lærugreinum. Síðani skulu næmingarnir skriva eina frágreiðing um granskingina og senda hana til Granskingarráðið.

Allir flokkar, sum luttaka, fáa prógv fyri, at teir hava verið við, og flokkurin, sum vinnur kappingina, fær virðisløn á 5.000 krónur, heiðurin at nevna seg Ársins Vitanarfróðu og vitjan av einum granskara.

Ársins Vitanarfróðu er skipað eftir leisti hjá Nysgjerrigper í Noregi. Granskingarráðið hevur gjørt skipanina einfaldari og lagað hana til føroysk viðurskifti.

Tey, sum hava hug at vera við, skulu senda tilfar inn til kappingina í seinasta lagi 23. apríl.

Meira um kappingina kann lesast her.

Flokkurin, sum vann kappingina í fjør var 5. flokkur í Kollafjarðar skúla. Seinni varð skipað fyri einum eyka umfari, og tað vann 4. flokkur í Vestmanna skúla.

placeholder
placeholder