Uttanlands

Frakland: Lærari hálshøgdur fyri at brúka Muhammed tekningar til undirvísing

Maðurin, sum verður hildin at hava framt drápið, varð skotin av løgregluni, og níggju onnur eru afturhildin í málinum

Franski forsetin, Emmanuel Macron vitjaði staðið, har drápið fór fram (Mynd: EPA)

Franski forsetin, Emmanuel Macron vitjaði staðið, har drápið fór fram (Mynd: EPA)

2020-10-17 12:55 Author image
Alda Nielsdóttir
placeholder

Seinnapartin í gjár var ein skúlalærari dripin nærindis einum skúla í býnum Conflans Saint-Honorine.

Lærarin hevði brúkt tekningar av profetinum Muhammed í sambandi við undirvísing um talufrælsi.

Maðurin, sum verður hildin at hava dripið læraran, er ein 18 ára gamal maður við kekenskum røtum, sum varð føddur í russiska høvuðsstaðnum Moskva.

Viðkomandi varð skotin av løgregluni og doyði seinni av sínum løstum.

Níggju onnur eru afturhildin í málinum, m.a. foreldur at einum barni, sum gekk á skúlanum, har lærarin arbeiddi. Hini eru familjulimir ella kenningar hjá manninum, sum varð skotin av løgregluni.

Álopið fríggjadagin verður lýst sum hálshøgging, skrivar Ritzau.

Emmanuel Macron, forseti í Fraklandi, lýsir álopið sum eitt týðiligt islamiskt yvirgangsálop.

placeholder
placeholder