Ingi Samuelsen
Hóast stóra prísvøksturin seinastu mánaðirnar, eru føroysku húsarhaldini sum heild væl fyri fíggjarliga. Inflasjónin og renturnar hava verið lágar seinasta áratíggju, samstundis sum lønirnar eru øktar, og tað merkir, at húsarhaldini hava fingið ein reallønarvøkstur. Økta inflasjónin hevur tó minkað um henda reallønarvøkstur síðani á sumri 2021
Tað skrivar Landsbanki Føroya í síni nýggjastu uppgerð yvir lønargongdina.
Seinastu níggju árini hava føroysku húsarhaldini harumframt økt um uppsparingina í føroysku bankunum; innlánini eru økt 60 prosent í tíðarskeiðinum frá árslok 2013 til árslok 2022.
Føroysku peningastovnarnir siga eisini frá, at húsarhaldini ikki biðja um skáa í størri mun enn vanligt, og at trotini ikki eru størri, enn tey plaga at vera. Tó slepst ikki undan, at summi húsarhald, sum longu frammanundan høvdu ilt við at fáa endarnar at røkka saman, eru komin í eini uppaftur verri fíggjarligari støðu við seinastu prís- og rentuhækkingunum.
- Verður almennur stuðul latin fíggjarliga sperdum familjum, eigur hann at vera miðvísur og avmarkaður til einans at røkka teimum, ið tørva stuðul, og hann eigur at vera fíggjaður, skrivar Landsbankin.
Vinarliga broyt tínar kennifíla - og privatlívsstillingar fyri at síggja hetta innihald