Fleiri túsund flutt burtur orsakað av skógareldi

Tað var leygardagin fyrrapartin, at ein ógvuligur skógareldur kyknaði í norðara enda á sponsku oynni Gran Kanaria. 

Í gjár var ein friðleysur dagur á oynni, har áleið 4000 fólk úr ymiskum býum í økinum vórðu flutt frá sínum heimi, og tíggju flogfør, tyrlur og áleið 700 sløkkiliðsfólk royndu at basa eldinum. Hetta upplýstu mynduleikarnar á Gran Kanaria til Reuters tíðindastovuna.

Eldurin hevur herjað á áleið 1700 hektarum, ellivu vegir eru stongdir, og tað hevur ikki eydnast at fingið tamarhald á honum. Spanski forsetisráðharrin hevur fingið umbøn um hjálp. 

Gran Kanaria var eisini rakt av skógareldum í seinastu viku. Tá herjaði tað í tvey samdøgur.