Fleiri skeinkistøð í Havn hava ikki fylgt tilmælinum um vikuskiftið

Nakað av fólki hevur verið at sæð í býnum um vikuskiftið, og í hesum sambandi er løgreglan eisini komin fram á fleiri skeinkistøð í Havn, sum ikki hava fylgt tilmælinum frá myndugleikunum.

Sambært tilmælinum, skulu skeinkistøð, matstovur o.a., fyri at minka um smittuvandan, lata aftur í seinasta lagi klokkan 22.

Bæði fríggjadagin og í gjár vóru fleiri skeinkistøð, sum høvdu opið aftaná klokkan 22, tó lótu tey framvegis aftur nógv fyrr enn vanligt. Fríggjadagin var talan um tvey skeinkistøð, og í nátt var talan um trý skeinkistøð.

Talan er um tilmæli, og hevur løgreglan tí ikki heimild at krevja, at støðini verða stongd, um tilmælið ikki verður fylgt, skrivar Kringvarpið.