Fleiri nýggir bygningar á Skansabryggjuni næsta ár

Faroe Ship og MTV-Byggivirkið hava í dag skrivað undir sáttmála um at byggja nýggjar bygningar á Skansabryggjuni, ið tilsamans verða 5.100m2 til støddar og sum koma afturat verandi 1.500m2 í Gráa Pakkhúsi.

Mortan Vang, stjóri á MTV-Byggivirkið, og Bogi P. Nielsen, stjóri á Faroe Ship, skrivaðu undir sáttmálan. Hesum boðar Faroe Ship frá í tíðindaskrivi í dag.

- Nýggju bygningarnir verða knýttur at verandi Gráa Pakkhúsi og koma í staðin fyri tað, sum í dag verður kallað Svarta Pakkhús. Svarta Pakkhús verður tikið niður í sambandi við umskipanina av økinum á Eystaru Bryggju.

Umskipanin av økinum á Eystaru Bryggju hevur eisini við sær, at Faroe Ship hevur ætlanir um at byggja nýggja høvuðsskrivsstovu í sama øki sum nýggju bygningarnir, og samráðingar eru við MTV-Byggivirkið um hesa verkætlanina.  

Bygningarnir verða eftir ætlan lidnir á heysti 2023, skrivar Faroe Ship.