Drápsmaðurin hjá Shinzo Abe skal mentalkannast

Maðurin, sum drap fyrrverandi japanska forsætisráðharran Shinzo Abe 8. juli skal mentalkannast, áðrenn hann kann ákærast í málinum.

Talan er um ein tá 41 ára gamlan mann, sum hevur játtað seg sekan.

Í rættinum kravdi ákærin, at maðurin skal afturhaldast og fara undir mentalkanning, og ein dómstólur í Nara í vestara parti av Japan, har maðurin búði og skeyt Shinzo Abe, hevur gingið hesum kravinum á møti.

Kanningin varar, sambært Reuters, til 29. november, og siðani verður støða tikin til, hvørt maðurin skal ákærast fyri drápið ella ikki.