Alda Nielsdóttir
41 ára gamli kanadiski sjónleikarin, Nick Cordero er deyður. Hann andaðist á sjúkrahúsi í Los Angeles, har hann hevði verið innlagdur í 95 dagar eftir at hava fingið staðfest COVID-19.
Tað skrivar kona hansara, Amanda Kloots, á Instagram.
Amanda Kloots hevur, sambært Ritzau, javnan lagt dagføringar út á sosiala miðilin, meðan maður hennara stríddist fyri lívinum.
Síðst í apríl skrivaði hon m.a., at beinið hjá honum mátti amputerast orsakað av innvortis bløðingum og ígerð í lungunum, sum elvdi til trupulleikar við blóðrenslinum.
Í apríl vaknaði sjónleikarin eftir at hava verið í eftirgjørdum koma í fleiri vikur. Síðan tá hevur hann strídst fyri lív sítt, men sunnumorgunin andaðist hann.
Nick Cordero var best kendur fyri sínar framførslur á Broadway, men hann spældi eisini við í krimi sjónvarpsrøðum sum "Blue Bloods", "Law & Order: Special Victims Unit" og norsku røðini "Lilyhammer".
Nick Cordero og Amanda Kloots hava verið gift síðan 2017, og saman eiga tey eitt árs gamla sonin Elvis.
Vinarliga broyt tínar kennifíla - og privatlívsstillingar fyri at síggja hetta innihald