Amerikanskt hernaðarflogfar fleyg lágt yvir Føroyum

(Upptøka: Ólavur Frederiksen, Faroephoto)

Eitt amerikanskt hernaðarflogfar var í gjár at síggja flúgvandi lágt yvir føroyskum firðum. Millum annað í Nólsoyarfirði og á Skálafjøðinum.

- Talan er um eitt amerikanskt hernaðarflogfar, og tey hava diplomatiskt loyvi at flúgva í føroyskum loftrúmi. Men vit hava biðið um, at fráboðan kemur áðrenn, so vit kunnu senda kunning til føroyingar, sigur Høgni Hoydal, uttanríkisráðharri.

Men hann staðfestir, at tað er ikki hent her, tí boð eru hvørki komin til Uttanríkisráðið ella til Arktisk Kommando.

- Tað eigur ikki at koma fyri, og vit geva boð á røttum stað, skrivar Høgni Hoydal á Facebook.