Venesuela letur sendistovuna í Oslo aftur

Venesuela boðaði í gjár frá, at tað fer at lata sendistovu sína í Oslo aftur. Boðini koma eftir at norska Nobelnevndin boðaði frá, at andstøðuleiðarin í Venesuela, María Corina Machado fær friðarheiðursløn Nobels í ár.

Í fráboðanini sigur Venesuela ikki, at tað er orsaka av friðarheiðurslønini, men sigur at niðurleggingin av sendistovuni í Oslo er ein liður í eini umskipan av uttanríkistænastuni.

Norska uttanríkisráðið váttar, at Caracas hevur stongt sína sendistovu í Oslo uttan at geva nakra beinleiðis orsøk, skrivar BBC.

Nobelnevndin í Oslo boðaði fríggjadagin frá, at María Corina Machado fær friðarheiðurslønina fyri hennara “ótroyttiliga arbeiði at stuðla demokratisku rættindini hjá fólkinum í Venesuela”.

Leiðarin í Venesuela, Nicolás Maduro, hevur fyrr kallað 58 ára gomlu Machado fyri eina “demoniska heks”.