Uppskot til dagførda dagstovnalóg sent til hoyringar

Uppskot til broyting í lógini um dagstovnar og dagrøkt er sent til almenna hoyring.

Lógin er frá 2000, og hevur tað í fleiri ár verið ynski um at fáa hana dagførda.

Sambært Barna- og útbúgvingarmálaráðnum er arbeiðið gjørt í tøttum samstarvi við Kommunufelagið, og er avgerð tikin um at byrja við teimum broytingum, sum eru mest grundleggjandi fyri at fáa eitt nútíðarhóskandi og fakliga greitt grundarlag fyri dagstovnaøkið.

Høvuðsbroytingarnar í uppskotinum eru:

• Greitt ábyrgdarbýti: Verandi ábyrgdarbýti verður nágreinað, so tað týðiliga framgongur, hvør hevur fakliga og fyrisitingarliga ábyrgd.
  
• Samstarvsnevnd: Ein nevnd við umboðum frá land og kommunum skal samskipa menning á økinum.
  
• Greið avmarking av tilboðum: Lógin fevnir um dagrøkt, vøggustovu, barnagarð og frítíðarstovnar til og við í minsta lagi 2. flokk.
  
• Reglur um upplatingartíðir: Reglurnar verða gjørdar greiðari; kommunan kann hava stongt upp til fimm vikur um árið.
  
• Ráðgeving: Kommunur skulu veita námsfrøðiliga ráðgeving; landið veitir sernámsfrøðiliga ráðgeving, tá serligur fakligur tørvur er.
  
  Hoyringarfreistin er 5. januar 2026, og fáa øll høvi at gera møguligar viðmerkingar. Uppskotið kann lesast her.