Tvøroyrar kommuna bjóðar aftur lesandi lestrarhølir um jólini

Seinastu árini hevur Tvøroyrar kommuna havt eina heldur serliga tænastu. Tað er at bjóða lesandi lestrarhølir um jólini.

Hetta kemur helst væl við hjá nógvum, sum eru í økinum um jóltíðir og hava tørv á eitt sindur av friði til umráðandi skúlaarbeiði.

Tvøroyrar kommuna skrivar á heimasíuðu sínari, at tænastan er til tey, sum eru heima í jólafrí og eru í holt við uppgávuskriving ella skulu til próvtøku.

- Tó eru eisini onnur lesandi vælkomin at nýta hølini. Hølini, í Skúlahúsinum í Gamla skúlagarði, eru rúmlig, hava internet og til ber at gera sær ein kaffimunn.

Hølini eru tøk frá mikudegnum 20.desember til og við mánagin 1.januar 2024. Tað er í tíðarbilinum frá klokkan átta um morgunin til á midnátt.

Ábyrgdarpersónurin fær lykil til hølið og kann læna lykilin út alt eftir hvør ynskir at nýta hølini. Allar leiðreglurnar kunnu lesast á tvk.fo.