Tveir dagar á rað uttan koronutilburð

Nógv bendir á, at tamarhald er á koronu í Føroyum. Av teimum 1.277 kanningunum, sum vórðu gjørdar í gjár, var eingin positiv, vísa tølini hjá heilsumyndugleikunum.

Ein varð staðfestur frískur í gjár, og talið á smittaðum í løtuni er nú komið niður á 12. Tá tað vóru mest í hesari fimtu bylgjuni av koronu í Føroyum, var talið 49 fólk.

49 fólk standa at vera í sóttarhaldi meðan tvey fólk eru innløgd á koronudeildini á Landssjúkrahúsinum í sambandi við koronu. Hesi tvey fólkini eru sjófólk á russiska trolaranum Kareliu, sum liggur á Runavík, og har 32 persónar umborð fingu staðfest koronu fyrr í vikuni.

Teir 32 tilburðirnir telja ikki við í føroysku tølunum.