Tveir av ætlaðu túrunum hjá Galaxy í morgin eru avlýstir

Tíðliga í morgun boðaði Strandferðslan frá, at avlýsingar kunnu væntast á Suðuroyarleiðini í morgin, hósdagin 18. september.

Nú seinnapartin er staðfest, at tvær av teimum fýra ætlaðu fráferðunum - tvær tær fyrstu - verða av ongum.

Hetta er vegna veðurforsøgnina og standin hjá Galaxy, í mun til hana:

- Fyri veður verða fráferðirnar á leið 7 kl. 6:00 av Krambatanga og kl. 11:30 av Havnini avlýstar, hósdag 18. septembur. Nærri kunning um siglingina restina av hósdegnum verður fráboðað í morgin.

Hetta skrivar ssl.fo.

Sambært ferðaætlanini í løtuni verður fyrsti túrurin í morgin ístaðin av Krambatanga klokkan 15.30. Galaxy stendur eisini enn at sigla av Havnini klokkan 19.00.

Sí ferðaætlanina her

Vit skrivaðu soleiðis um støðuna fyrr í dag:

Galaxy og siglingin um Suðuroyarfjørð hava skapt øsing og órógv hjá serliga suðuroyingum í seinastuni.

Suðuroyingar kenna seg - av røttum - við sviðið soð - nú ferðasambandi er, sum tað er, meðan Smyril er í dokk. 

Spurningar hava verið um trygduna. Millum annað kundi Kringvarpið í gjár vísa á, at Galaxy hevur siglt ólógliga onkran túrin: Við hekkuportrinum opnum. Strandferðslan hevur, útfrá upplýsingum frá manningini á túrinum 1. september, víst hesum aftur.

Avloysaraskipið siglir færr túrar, enn Smyril vanliga ger, og fyrr í mánaðinum hevur siglingin verið nakað óstøðu. Nakrir túrar vórðu fluttir ella avlýsir vegna veður.

Galaxy kann ikki sigla í ávísum veðurumstøðum, og vegna "vána veðurforsøgn" í morgin kann roknast við, at engin sigling verður á leið 7 hósdag 18. septembur.

Hetta skrivar Strandferðslan á heimasíðu sínari í morgun. 

Harvið noyðast nógv fólk helst at finna aðrar loysnir, um tey skulu úr Suðuroynni ella til har frá í kvøld og eitt stórt samdøgur fram.