Tríggir menn í hóslag við løgregluna aftaná dystin - allir føroyingar

Løgreglan var væl fyrireikað til Conference League-dystin millum HB og Brøndby í gjárkvøldið. Politistar úr Brøndby-økinum vóru komnir til Føroya og hildu saman við føroyska politiiðnum stýr uppá tropparnar.

Tríggir menn vóru í hóslag við løgregluna eftir dystin í gjár, men talan var ikki um gulklæddar hooligans. Tað vóru allir føroyingar.

Ein av tí grovara slagnum. Ein maður 30'unum spýtti og vísti longutong móti løgregluni. Sum skilst á vaktleiðaranum á politistøðini í morgun, hevur maðurin okkurt annað hangandi og tí skal ikki líka nógv til. Hann varð handtikin og situr í brummuni. Hann verður grundlógarhoyrdur í dag - væntandi seinnapartin.

Tveir aðrir menn - teir vóru í tjúgunum - fingu bót fyri brot á skilhaldsreglurnar. Hetta var fyri ikki at akta boðini frá løgregluni. Hjá tí eina kom tað so langt, at hann varð tikin við á politistøðina, tí hann ikki vildi upplýsa navn. Tá hann kom á støðina, broytti hann kortini meining, og varð tí leyslatin aftur.

Byrjaði tíðliga seinnapartin
Tað byrjaði annars alt í Glitnum og Irish Pub á Skálatrøð longu klokkan 15 seinnapartin í gjár. Brøndby-fjepparar, sum tilsamans vóru upp ímóti 500, hittust her, og løgreglan var mannsterk til staðar.

(Mynd: Sverri Egholm)

Alt gekk tó kortini friðarliga fyri seg.

- Teir markera seg sjálvandi við at teir eru í býnum. Teir syngja og vísa kulør, men annars var friðarligt tá, sigur vaktleiðarin á politistøðini í morgun.

Tað varð avtalað við teir áðrenn, at um teir uppførdu seg ordiligt, so fingu teir langan snór. Hetta alt í samráð við løgregluna frá Brøndby-økinum. Tann javnvágin riggaði fínt, upplýsir vaktleiðarin.

Um seks tíðina varð gingið niðan móti Tórsvølli. Eisini hetta gekk friðarliga fyri seg. Onkur helt, at tað minti um eina jarðarferð.

Ein burturvístur av Tórsvølli
Nakrar reglugerðir mugu fylgjast á Tórsvølli, tá slík vitjan er, so tað ikki elvir til rok. Í einum føri var ein dani, sum tó ikki var Brøndby-fjeppari, burturvístur av økinum stutt inn í seinna hálvleik. Hann provokeraði Brøndby-fjeppararnar við einum bannrara ella líknandi. Um hetta var ein FCK-fjeppari ella hvat, sigur søgan einki um.

(Mynd: Sverri Egholm)

Tá dysturin varð liðugur vóru sum nevnt omanfyri, tríggir føroyingar tiknir fyri brot á ymsan hátt. Nakrir av donsku Brøndby-fjepparunum fóru oman aftur í Glitnir og Irish Pub og hildu til har, til tað stongdi um tvey tíðina í nátt.

Á veg oman móti býnum leyp onkur inn í onkran urtagarð, men tað var ikki nakað herverk ella rok annars. Tá skeinkistaðið stongdi uppstóð onkur støða, og ein maður varð burturvístur. Annars var friðarligt.

Flestu fjeppararnir fara av landinum í morgun, og løgreglan verður eisini til staðar á flogvøllinum í dag.