Starmer og stjórn hansara halda fram

Bretski forsætisráðharrin, Keir Starmer, hevur ongar ætlanir um at taka seg aftur, hóast hann nú eisini er undir trýsti frá egnum floksfeløgum eftir vánaligu valúrslitini í farnu viku.

Í eini fráboðan frá ráðharraskrivstovuni eftir ein stjórnarfund í dag, sigur Starmer, at hann tekur ábyrgdina av valósigrinum hjá Labour, men at “landið væntar”, at hann og stjórn hansara halda fram við sínum arbeiði.

Ein av ministarunum í stjórnini hjá Starmer, Miatta Fahnbulleh, boðaði stutt eftir fundin í dag frá, at hon leggur frá sær, og heitti á forsætisráðharran um at gera tað sama. Fanbulleh er ein av sokallaðu ‘juniorministarunum’ í bretsku stjórnini. Hon hevur verið ráðkvinna fyri miðspjaðing, trúgv og nærsamfeløg.

Bretskir fjølmiðlar hava skrivað, at eisini Shabhana Mahmod, innanríkisráðkvinna hevur heitt á Starmer um at leggja frá sær. Annars skal Starmer hava fingið stuðul frá restini av stjórnini til at halda fram við arbeiðinum.

Í fráboðanini staðfestir Starmer eisini, at tilgongdin, sum krevst til tess at velja nýtt forfólk í flokkinum, ikki er farið ígongd enn. Her sipar hann til, at 81 floksfelagar í tjóðartinginum hava heitt á Keir Starmer um at leggja frá sær, uttan tó at hava víst á eitt annað forfólkaevni.

Labour hevur í løtuni 401 tinglimir í bretska undirhúsinum.

Les eisini grein frá í gjár: Starmer gevst ikki á hesum sinni