Innanlands

Skorheim hevur kallað inn til skipandi fund

Skjal um samgongusamstarv er undirskrivað, men í morgin, hósdagin, verður nývaldað býráðið í Klaksvík formliga skipað

Meiriluti er funnin uttanum Jógvan Skorheim og Fólkaflokkin. Karl Johansen heldur fram sum borgarstjóri í Klaksvík, og Javnaðarflokkurin, Tjóðveldi og Sjálvstýri vera í samgongu saman við Sambandsflokkinum (Savnsmynd: Jens Kr. Vang)

2024-12-11 13:55

Agnar Prestá

Hann og flokkurin fáa ikki slíka ávirkan, sum man ætlaði áðrenn, men ásett er at fyrstvaldi á størsta listanum skal kalla inn til skipandi fund.

Tað hevur Jógvan Skorheim nú gjørt, og í morgin, hósdagin 12. desember klokkan 17.30, fer nývalda býráðið í Klaksvíkar kommuna at formliga skipa seg á almennum fundi.

Hetta verður gjørt júst ein mánaða eftir valið, har Fólkaflokkurin aftur varð nógv størsti flokkur í kommununi við fimm býráðslimum. Sambandsflokkurin og Tjóðveldi høvdu tó eisini góð val, og meiriluti er funnin uttanum Jógvan Skorheim og Fólkaflokkin.

Karl Johansen heldur fram sum borgarstjóri í Klaksvík. Í verandi setu hevur hann verið borgarstjóri og í samgongu við Fólkaflokkin.

Nú skulu Javnaðarflokkurin, Tjóðveldi og Sjálvstýri vera saman við Sambandsflokkinum í býráðssamgongu í einari av størstu kommununum í landinum árini 2025-2028. Tey hava seks býráðslimir samanlagt.

Karl Johansen tók við sum borgarstjóri 1. januar 2021. Nú fekk Sambandsflokkurin ein býráðslim afturat, og

Heimasíðan hjá Klaksvíkar kommunu skrivar, at skipandi býráðsfundurin verður hildin í Varpinum, har regluligu fundirnir hjá býráðnum nú verða hildnir.

Til ber eisini at lurta eftir býráðsfundinum á stream(.)fo og á FM 98,7. Byrjað verður klokkan 17.30 í morgin.

Sí býráðsskránna her

Vinarliga broyt tínar kennifíla - og privatlívsstillingar fyri at síggja hetta innihald