Skipa fyri tiltaki um fíggjarligan harðskap

Fíggjarligur harðskapur er evnið á tiltaki á altjóða degnum móti harðskapi móti kvinnum 25. november, sum Sig Frá, Kvinnuhúsið og Kvinnufelagið í Havn skipa fyri.

Her verður varpað ljós á, hvussu fíggjarligur harðskapur vísur seg, hvørjar lógarásetingar eru galdandi á økinum og hvussu fíggjar heimurin kann verða við til at fyribyrgja fíggjarligum harðskapi, skrivar Almanna- og mentamálaráðið í tíðindaskrivi.

Á tiltakinum verða tríggjar framløgur at lýsa evnið:

• Ráðgevi úr Kvinnuhúsinum um
  “Hvat er fíggjarligur harðskapur og hvussu ávirkan hann tann harðskapsrakta?”.
• Mimi Steintórsdóttir, advokatur, fer at greiða frá
  “Hvørjar eru galdandi lógarásetingar í sambandi við fíggjarligan harðskap?
• Turið Arge, forstjóri í Føroya Banka hevur framløgu um
  “Hvat ger fíggjarheimurin fyri at fyribyrgja fíggjarligum harðskapi?”

Eftir ein steðg fer Óluva Zachariassen at hava samrøðu við eina føroyska kvinnu, um at liva í fíggjarligum harðskapi og hvussu hesar umstøðurnar hava ávirkað lív hennara.

Síðani verður hildið fram við pallborði, við luttøku av Bjarna Kárasyni, landsstýrismaður í lógarmálum, Sirið Stenberg, landsstýrikvinna í uttanríkis- og vinnumálum og Ruth Vang, landsstýriskvinna í fíggjarmálum.

Tiltakið, sum er alment og ókeypis, verður fyriskipað týsdagin 25. november
frá klokkan 13 til 16 í Smæruni, J.H. Schrøters gøta 7 í Havn.