Alda Nielsdóttir
Um ES skal varðveita ein leiðandi leiklut í altjóða politikki, hevur ES ikki ráð til at lata limalond varðveita vetorættin, tá tað kemur til uttanríkis- og trygdarpolitikk, sigur týski samveldiskanslarin, Olaf Scholz.
Hetta málið er enn meira umráðandi, nú kríggj er í Ukraina.
Scholz sigur, at einstakir statir mugu steðga við at seta "egoistiskar forðingar" fyri felagsavgerðir í Evropa.
Ein felagspolitikkur skal vera galdandi tá tað snýr seg um alt frá tilflytarar til menning av einari felags evropeiskari verju, tí ES skal vera ein geopolitiskur aktørur á heimspallinum, sigur hann sambært Ritzau.
Varandi ósemjur millum limalondini gera ES veikari, og tí er tað umráðandi, at ES er samt í hesum tíðum, sigur Scholz, sum leggur afturat, at stjórn hansara fer at koma við einum ítøkiligum uppskoti hesum viðvíkjandi ein av komandi mánaðunum.
Uttanríkis- og trygdarpolitikkur er eitt av teimum fáa økjunum, har ES í løtuni bert kann taka avgerðir, um øll 27 limalondini eru samd. Men í flestu førum er nóg mikið við einum serstakum meiriluta.
Vinarliga broyt tínar kennifíla - og privatlívsstillingar fyri at síggja hetta innihald