Samráðingarnar byrjaðar: Bert floksformenninir í fyrstu syftu

Fyrst sótu flokkarnir hvør sær í tingbólkunum í hølunum í Løgtinginum. Og fyri lítlari løtu síðani fóru fyrrverandi løgmenninir Akseli V. Johannesen og Bárður á Steig Nielsen og samráðingarleiðarin Beinir Johannesen stutt leiðina yvir í hølini hjá Havnar Arbeiðarafelag - hinumegin brekkuna millum tann bygningin og løgtingsbygningin.

Har hava løgtingsfólk kontórhøli, og í mun til undanfarnar samráðingar, verður tað har. at samráðingar um ABC-samgongu fara fram. Í øllum førum í fyrstu syftu.

Á veg yvirum...

Og síðani inn - frammanfyri einari fjøld av fjølmiðlafólki (Myndir: Sverri Egholm) 

Í fyrstu syftu eru tað bert Beinir Johannesen, Bárður á Steig Nielsen og Aksel V. Johannesen, floksformenninir, sum tosa saman.

Sí eisini: Beinir roynir at finna felags stev við Bárði og Akseli

Óvist er, nær hini 19, sum eru vald inn fyri Fólkaflokkin, Sambandsflokkin og Javnaðarflokkin veruliga gerast partur av samráðingunum.

Portalurin og FM1 fylgja samráðingunum tætt næstu tíðina, og hava vit viðmerking frá Bárði á Steig Nielsen skjótt - umframt meira frá samráðingunum í tíðindunum á FM1 klokkan 12

Johan Dahl, tingmaður fyri Sambandsflokkin, bíðar spentur (Mynd: Sverri Egholm)